Энэ блогоос: | Үүцлэх | өөр блог » |
Блог үүсгэх | Нэвтрэх |
Өнгөрсөн бямба гаригт Английн премьер лигийн 31 дүгээр тойргийн найман тоглолт боллоо. Лигийг тэргүүлэгч "Челси" "Ньюкасл"-ыг талбай дээр нь, "Арсенал" "Манчестер Сити"-г тус тус 2:0-ээр, "Ливерпүүл" "Фулхэм"-ийг 1:0-ээр буулган авлаа.
"Ньюкасл"-ын хувьд Алан Ширерийн удирдлага дор анхны тоглолтоо "Челси"-тэй хийж хожигдол хүлээлээ. Тоглолтын эхний үе хоёр багт гоол оруулах хэд хэдэн боломж гарсан ч ашиглаж чадсангүй 0:0-ээр өндөрлөсөн.
Хоёрдугаар үед "Челси" илүү идэвхтэй тоглож, тоглолтын 57 дахь минутад Фрэнк Лампард эхний гоолыг оруулав. Николя Анелькагийн өшиглөсөн бөмбөг хаалганы хөндлөвчинд ойн ирэхэд тэрбээр боломжийг алдсангүй.
Үүнээс 10 орчим минутын дараа Флорен Малуда тоглолтын эцсийн цэгийг тавив.
Энэ өдөр "Арсенал" талбай дээрээ "Манчестер Сити"-г итгэл төгс яллаа. Ялалтын хоёр гоолыг гэмтлээс эргэн ирсэн довтлогч Эммануэль Адебайор оруулсан. Эхний гоолыг тоглолтын найм дахь минутад толгойгоороо мөргөн оруулсан бол хоёрдугаар үеийн эхэнд хожлын гоолыг хийлээ.
Дашрамд сонирхуулахад, "Арсенал"-ын албан ёсны сайтаас явуулсан санал асуулгаар гуравдугаар сарын шилдэг тоглогчоор ОХУ-ын легионер Андрей Аршавин шалгарчээ. Тэрбээр санал асуулгад оролцогчдын 54.9 хувийн санал авсан байна.
Гуравдугаар сард Лондоны баг Аршавины оролцсон таван тоглолтод ялалт байгуулж, тоглогч өөрөө таван гоолын дамжуулалт өгч, "Блэкберн"-ы хаалганд нэг бөмбөг оруулжээ.
"Ливерпүүл" "Фулхэм"-ийн тоглолт ширүүхэн болж хоёрдугаар үед сэлгээгээр талбайд гарч ирсэн Йосси Бенаюн шүүгчийн мэдлийн цагт өрсөлдөгчийнхөө хаалганд бөмбөг оруулан багаа аварлаа.
Ингэснээр "Ливерпүүл" "Манчестер Юнайтед"-аас хоёр оноо илүү болж, премьер лигийг тэргүүлж эхэллээ. Гэхдээ "улаан чөтгөрүүд"-д 65 оноотой, хоёр тоглолт дутуу байгаа.
Тэдний араас "Челси" 64, "Арсенал" 58 оноотой нэхэж явна.
Энэ өдөр болсон бусад тоглолтуудад "Уэст Хэм" "Сандерленд"-г, "Стоук Сити" "Уэст Бромвич"-г 2:0-ээр, "Болтон" "Мидлсбро"-г 4:1-ээр, "Блэкберн" "Тоттенхэм"-г 2:1 -ээр тус тус буулган авч, "Халл Сити" "Портсмут" 0:0-ээр эвийн гэрээ байгуулжээ.
С.Баяр
 |